കർമ്മത്തിന്റെ ഉറവിടം

Q: ചോദ്യം: സദ്ഗുരു, ജീവിതത്തിൽ കയ്പേറിയ അനുഭവങ്ങൾ ഉണ്ടെങ്കിൽ, അത് നമ്മുടെ മുൻകാല ചെയ്തികളാലാണ് എന്ന് അങ്ങ് പലപ്പോഴും പറഞ്ഞിട്ടുണ്ട്. ഭാവിയിൽ ദു:ഖം ഒഴിവാക്കാൻ ഇന്ന് ഞങ്ങൾ എത്തരത്തിലുള്ള പ്രവൃത്തികൾ ചെയ്യണം?

కర్మకు మూలం ఏది..?

സദ്ഗുരു: ഏതൊരു അനുഭവവും കയ്പേറിയതാകുന്നത് എന്തു സംഭവിക്കുന്നു എന്നതിനനുസരിച്ചല്ല, മറിച്ച് നിങ്ങൾ അത് എങ്ങനെ സ്വീകരിക്കുന്നു എന്നതിനനുസരിച്ചാണ്. ഒരാൾക്ക് വളരെ കയ്പേറിയ അനുഭവം മറ്റൊരാൾക്ക് അനുഗ്രഹമായി മാറിയേക്കാം. ഒരിക്കൽ, വളരെ ദുഃഖിതനായി, ഹൃദയം തകർന്ന ഒരു മനുഷ്യൻ ഒരു കല്ലറയിൽ തലയിടിച്ച് കരയുകയായിരുന്നു, "എന്റെ ജീവിതം! ഓ! ഇനി ഇത് എത്ര അർത്ഥശൂന്യമാണ്! നീ പോയതിനാൽ എന്റെ ഈ മൃതശരീരം കൊണ്ട് എന്ത് പ്രയോജനമാണുള്ളത്. നീ മരിച്ചില്ലായിരുന്നെങ്കിൽ! വിധി നിന്നെ ഈ ലോകത്തു നിന്നും അപഹരിക്കാൻ തക്ക ക്രൂരത കാണിച്ചില്ലായിരുന്നെങ്കിൽ! എല്ലാം എത്ര മനോഹരമാകുമായിരുന്നു!" സമീപത്തുണ്ടായിരുന്ന ഒരു പുരോഹിതൻ ഇത് കേട്ട് പറഞ്ഞു, "ഈ മൺകൂനയ്ക്ക് താഴെ കിടക്കുന്ന ഈ വ്യക്തി നിങ്ങൾക്ക് വളരെ പ്രധാനപ്പെട്ട ഒരാളാണെന്ന് ഞാൻ കരുതുന്നു." "പ്രാധാനപ്പെട്ടതാണോ എന്നോ? അതെ, തീർച്ചയായും," എന്നിട്ട് ആ മനുഷ്യൻ കൂടുതൽ ഉച്ചത്തിൽ അലറിക്കരഞ്ഞു, "ഇത് എന്റെ ഭാര്യയുടെ ആദ്യ ഭർത്താവായിരുന്നു!" എന്ത് സംഭവിക്കുന്നുവെന്നതല്ല അനുഭവത്തെ കയ്പുള്ളതാക്കുന്നത്. അതിനെ നിങ്ങൾ എങ്ങനെ അനുഭവിക്കുന്നു എന്നതാണ് കാര്യം. അതുപോലെ, കർമ്മം എന്തുതരം പ്രവൃത്തികളിൽ ഏർപ്പെട്ടു എന്നതിലല്ല, മറിച്ച് ആ പ്രവൃത്തിയുടെ പിന്നിലെ ഇച്ഛ എന്തായിരുന്നു എന്നതിലാണ്.

നിങ്ങൾ എന്നോട് അല്പം തുറന്ന മനസ്സുള്ളവരാണെങ്കിൽ, നിങ്ങളുടെ ഇച്ഛ ഇല്ലാതാകുന്നു, അപ്പോൾ നിങ്ങൾ ആവശ്യമുള്ളത് മാത്രം ചെയ്യുന്നു. അതാണ് അവബോധം അർത്ഥമാക്കുന്നത്; അവിടെ ഇച്ഛയില്ല. ഇച്ഛയില്ലാത്തിടത്ത് കർമ്മമില്ല. ഉൾക്കൊള്ളുക എന്നാൽ നിങ്ങൾ ആവശ്യമുള്ളത് മാത്രം ചെയ്യുന്നു എന്നാണ്. പരിധികളില്ലാത്ത ഉത്തരവാദിത്തം എന്നാൽ നിങ്ങൾക്ക് പ്രത്യേകിച്ച് ഒരു ഇച്ഛയില്ല എന്നാണ്. ഓരോ സാഹചര്യത്തിലും, നിങ്ങളുടെ അവബോധത്തിനനുസരിച്ച് ആവശ്യമെന്ന് കാണുന്ന കാര്യങ്ങൾ നിങ്ങളുടെ കഴിവിനനുസരിച്ച് നിങ്ങൾ ചെയ്യുന്നു. നിങ്ങളുടെ ഇച്ഛയുടെ ശക്തിയാണ് കർമ്മത്തെ കെട്ടിപ്പടുക്കുന്നത്; ആ ഇച്ഛ നല്ലതാണോ മോശമാണോ എന്നത് പ്രസക്തമല്ല.

ആളുകൾ എന്നോട് ഈ ചോദ്യം വീണ്ടും വീണ്ടും ചോദിക്കാറുണ്ട്, "താങ്കളുടെ ദൗത്യം എന്താണ്?" എന്ന്. "എനിക്ക് ഒരു ദൗത്യവുമില്ല, ഞാൻ വെറുതെ കറങ്ങിനടക്കുകയാണ്" എന്ന് ഞാൻ പറയുമ്പോൾ അവർ കരുതുന്നത് ഞാൻ തമാശ പറയുന്നുവെന്നാണ്. ഈ ഭൂമിയിൽ ജീവിക്കുന്നതിനെക്കുറിച്ച് എനിക്ക് പറയാൻ കഴിയുന്ന ഏറ്റവും ആഴമേറിയ പ്രസ്താവന ഇതാണെന്ന് അവർക്ക് മനസ്സിലാകുന്നില്ല. പ്രത്യേകിച്ച് ഒരു ഇച്ഛയില്ലാതെ ആവശ്യമുള്ളത് ചെയ്യുക, അത്രമാത്രം. അപ്പോൾ, നിങ്ങൾ എന്തിലൂടെ കടന്നുപോയാലും, കർമ്മമില്ല. എന്താണോ ആവശ്യമുള്ളത്, അതാണ് നിങ്ങൾ ചെയ്യുന്നത്. എന്തെങ്കിലും ചെയ്യാനുള്ള നിങ്ങളുടെ ഉദ്ദേശ്യത്തിന്റെ അടിസ്ഥാനത്തിലാണ് കർമ്മമുള്ളത്. നിങ്ങൾക്ക് ഒന്നും ചെയ്യാനുള്ള ഉദ്ദേശ്യമില്ല, ആവശ്യമുള്ളത് മാത്രം നിങ്ങൾ ചെയ്യുന്നു - അപ്പോൾ അതിൽ കാർമ്മികമായ ബന്ധനമില്ല. അത് നല്ലതോ ചീത്തയോ അല്ല.